د چارچۆڤێ ھەولێن بەردەوام یێن سەنتەرێ پەرەپێدانا کاری (Career Development Center – CDC) دا بۆ گەشەپێدانا شیانان و خزمەتکرنا بازاڕێ کاری، نوینەرێ زانکۆیا مە پشكداری د وۆرکشۆپەکا ناڤدەولەتی دا کر.
بەرێز (عبدالله محمدسعید بیتاش)، وەکۆ نوینەرێ سەنتەرێ پەرەپێدانا کاری ل زانکۆیا ئاکرێ، پشكداری د وۆرکشۆپا “چەوانیا پشـتەڤانیکرنا خودان کاران ل عیراقێ” (How to Support Entrepreneurs in Iraq) دا کر، ئەوا کو ژ لایێ رێکخراوا ناڤدەولەتی یا کاری (ILO) ڤە ھاتیە رێکخستن.
ئەڤ وۆرکشۆپە ل رۆژێن (۲٤ ھەتا ۲۷ تشرينا دووێ ٢٠٢٥) ل باژێرێ سلێمانیێ برێڤە چوو، و ب پشکداریا نوینەرێن وەزارەتا کار و کاروباڕێن جڤاکی و رێڤەبەریێن گشتی یێن کار ل پارێزگەھێن ھەرێما کوردستانێ (دھۆک، ھەولێر، سلێمانی) و پارێزگەھا نەینەوا و ژۆرێن بازرگانی ھاتە ئەنجامدان.
د وۆرکشۆپێ دا، نویترین ستراتیژی و میتۆدێن جیھانی بۆ پشتەڤانیکرنا خودان کاران و گونجاندن و رێکخستنا پەیوەندیێن وان دگەل سەنتەرێن کاری ھاتنە گەنگەشە کرن. نوینەرێ زانکۆیا ئاکرێ رۆلەکێ چالاک و بەرچاڤ د تێکەلی و گەنگەشەیان دا ھەبوو، کو شیان و گرنگیدانا زانکۆیا مە ب ڤی بواری نیشاندا.
ئارمانج ژ ڤێ پشکداریێ ڤەگوھاستنا ڤان زانین و ئەزموونێن نوی یە بۆ سەنتەرێ پەرەپێدانا کاری ل زانکۆیا مە، دا کو بشێین ب شێوەیەکێ باشتر خزمەتا قوتابی و دەرچوویێن خۆ بکەین و وان ب شێوەیەکێ ئەکادیمی و پیشەیی بۆ بازاڕێ کاری ئامادە بکەین.

زانکۆیا ئاکرێ بۆ زانستێن کرداری